Mae wedi ei leoli ger pentref City Dulas.

Aber amgaeedig yw Traeth Dulas gyda morfa heli eang a thraethell mwd a thywod pan fo’r llanw ar drai. Mae’r ardal yn cynnal amrywiaeth eang o adar môr, adar y glannau, rhydwyr ac adar hela gan gynnwys gwylanod, pibydd y mawn, cwtiad y traeth a’r chwiwell.

Yn y gaeaf y prif adar a welir yw’r gwylanod a’r rhydwyr. Gellir gweld y gylfinir ar y dolydd ger y safle, a gellir gweld y pibydd du a rhydwyr bach eraill ar y lan tuag at ochr y môr o’r tafod o raean. Mae adar ysglyfaethus gan gynnwys yr hebog tramor a’r cudyll bach yn hela ar draws yr aber tra gellir gweld y boda tinwyn a’r dylluan wen yn patrolio ymylon y bae.

Yn yr haf mae’r aber yn cynnal amrywiaeth o adar sy’n magu ac mae llawer ohonynt yn defnyddio’r ardal i nythu, bwydo a magu eu cywion. Mae enghreifftiau yn cynnwys pioden y môr, hwyaden yr eithin, y pibydd coesgoch, yr hwyaden frongoch a’r cwtiad torchog. Mae’r fôr-wennol bigddu a’r crëyr glas sy’n bridio’n lleol yn ymweld yn gyson â’r safle fel mae’r hwyaden wyllt a’r gornchwiglen.

Mae’r draethell leidiog a’r lleiniau rhynglanw yn cynnal amrywiaeth mawr o rydwyr ac adar hela. Mae’n bosibl parcio ar ochr orllewinol yr aber ond byddwch yn ymwybodol fod yr ardal i gyd dan ddŵr ar lanw uchel, felly mae’n werth gwirio amseroedd y llanw’n lleol cyn ymweld rhag ofn i chi gael ei dal gan y llanw.